【職場生存必備系列—拒絕的能力(下集)】#拒絕的能力
上一篇講到，喺職場上要做好人，但就唔好做無底線嘅大好人。遇到唔公義、唔合理嘅事，發脾氣決斷say no好正常，更加唔會影響邁向成功嘅道路。
撇除先天脾氣好嗰班，咁多人會選擇吞聲忍氣，無非受後天觀念影響。以下就有七種觀念，睇吓係咪令你萬事死忍、過度善良嘅原因？
第一，人哋嘅事排第一位
有時責任感過於強，以為對方無咗自己唔得，所以明明未做晒啲嘢，都走去幫其他人解決問題，死頂過後難為自己。
第二，同理心泛濫
幫助弱勢社群係好事，但同理心泛濫，無論對方好人定壞人，出於本能伸出援手，隨時好心做壞事。
第三，做人無底線
如果無主見同底線，受到對方再三請求，自己就迎合對方想法，將界線越定越低，自然俾人牽住鼻子走。
第四，關係良好就要幫
好多人義字行頭，只要對方同自己關係好，就會想辦法出盡力幫手，誰不知係無底深潭。
第五，人哋搵得幫手就係信任
為咗報答對方對嘅信任，對於所有請求都毫無防範，但其實對方睇中唔係你能力，只係貪你就手。
第六，任何犯錯都會原諒
錯誤只係無心之失，或者影響範圍好細，當然可以原諒對方。之不過俾對方知道你菩薩心腸，到最後點都會原諒佢，可能會變本加厲肆意傷害你。
第七，拒絕會有不良後果
好多人唔敢拒絕對方，就係怕留低壞印象，影響日後事業發展；又或者第日自己有事相求，對方會托手踭報復。
所以，做人要有原則有底線，同時小心墮入過度善良陷阱，否則俾職場老鬼搓圓撳扁，仲要低聲下氣多謝對方，就真係認真陰公喇！
Search